proxims termins

09-07-2021, 20:00 Radunonza generala   Greina Rabius
11-07-2021, 09.30 Turnier da premis   Plaz da ballapei Trun

péz a cup restai sul streh

Trun/Rabius Grp. 1 gudogna il giug capital a Gams cun 2:1.

La constellaziun tabellara avon il davos giug dalla sesiun empermetteva in duel captivont denter ils dus vischins alla cua dalla tabella: Per restar en 3. ligia tunscheva al CB Trun/Rabius Grp. 1 in pari, ferton che Gams era dependents d’ina victoria per aunc stuschar ils Sursilvans sut il streh.

L’equipa songagliesa para dad esser preparada optimal sin quei giug capital. Gams entscheiva meglier il giug, gudogna pli bia cumbats e vegn tras lur sperts giugadurs d’ala beinenqual ga tier acziuns prigulusas. Ord ina da quellas acziuns resulta lu era igl avantatg meritau. Suenter 26’ vegn il giugadur agil Michael Giger sill’ala seniastra vid il bal, survarga in defensur e stauscha il bal bass sper il goli Mauricio Cathomas direct ella reit. Il CBTR vegn en quella mesadad buc da dictar il giug e las cumbinaziuns ell’offensiva che vevan l’jamna vargada aunc incantau mauncan per gronda part. Cuort avon pausa insinuescha il hosp dalla Cadi denton tgei che fuss pusseivel: Ella 37avla minuta survegn Salvatore Staglianò in bal liung ella gassa e sa cuorer direcziun gol. Il goli da Gams scursanescha il cantun e vegn da rebatter il siet, denton mo anavon nua che Patrizio Decurtins e Beat Cadruvi ein omisdus perschuadi d’egualisar il giug. Tuppamein, ord vesta dils Sursilvans, impedeschan els in l’auter ed aschia fila il siet da Patrizio Decurtins la finfinala sper la petga dretga vi. 

Era suenter il te da pausa eis ei denton l’equipa da casa che vegn tier occasiuns da gol. Ella 51’ tucca Igor Manojlovic cun in ferm siet la petga. Ils trenaders Donat Albin e Philippe Vincenz reageschan, fan suenter in’ura gest treis midadas e vulan aschia dar niev slontsch all’equipa. E mira cheu: Mo tschun minutas pli tard vegnan ils hosps pilver d’egualisar. Igl 1:1 croda suenter in’acziun singula ed era in tec ord il nuot. Ord biebein 25 meters stauscha Livio Janka in culp liber cugl intern dil pei sper il mir da Gams vi el cantun dretg. Cun quei resultat ei uss puspei Gams sut squetsch. Ei cuoza denton tochen cuort avon la fin tochen che la squadra da casa vegn da far squetsch ella da sedisch da Trun. Mo lu sesviluppescha il giug propi tier in crimi: Duas gadas ston ils defensurs dils hosps, Mathias Flepp e Damian Schmed, sclarir cun comba stendida. Ed ella 90avla minuta ston ils fans da Trun/Rabius aunc inaga trer flad profundamein cu ina situaziun dispiteivla ella da sedisch vess bein saviu muntar penalti per Gams. Gl’arbiter valetescha in cumbat malsurveseivel denton buca sco foul ed aschia vegnan ils hosps cuort pli tard d’eliminar ils davos dubis. Suenter ina cunterattacca vegn Gianin Derungs ella 95’ da cuorer tut persuls naven dalla lingia da miez viers il gol bandunaus ed ha buca miserias da stuschar il bal ella reit. Pura ecstasa tier giugadurs sco era fans dil CB Trun/Rabius. Il 2:1 ei medemamein la davosa acziun dil giug. Ils Sursilvans restan en 3. ligia.

Il giug sez ei staus da qualitad plitost mediocra ed in sulet cumbat. Mo quei ei la fin finala insumma buc impurtont pil CBTR. L’equipa ei mitschada péz a cup dalla relegaziun, ha mussau morala suenter ina fleivla emprema mesadad ed ha cun engaschi cumplein da finadin giugadur aunc viult il resultat. Quei mereta respect ed ei era in success per la giuvna collaboraziun denter ils dus anteriurs rivals dalla Cadi Trun e Tavanasa.

 

informaziuns: 3. ligia, gruppa 1; FC Gams – CB Trun/Rabius 1:2 (1:0); Pilgerbrunnen Gams, 250 aspectaturs

gols: 26' Michael Giger 1:0, 65’ Livio Janka 1:1, 90+5’ Gianin Derungs 1:2

CB Trun/Rabius 1 Grp. (4-4-2): Mauricio Cathomas, Sandro Orlik (C), Livio Janka, Gion Andrea Nay (61’ Fabio Caduff), Damian Schmed, Clau Berther (61’ Orlando Monn), Mathias Flepp, Beat Cadruvi, Daniel Pfister (85’ Patrizio Decurtins), Salvatore Staglianó (61’ Gianin Derungs), Patrizio Decurtins (46’ Remo Alig) 

FC Gams 1 (3-5-2): Mike Hilty, Sandro Gantenbein (51’ Michele Beti), Nicolas Fäh (C), Rapahel Wyss, Kilian Büchel (87’ Jorge Lopez Lopez), Michael Giger, Aydin Demirci (56’ Nino Marinello), Igor Manojlovic, Patrik Bachmann, Gary Hoppeler (76’ Yusuf Akyer), Amine El Hajjam 

remarcas: cartas melnas: 47’ Gion Andrea Nay, 70’ Amine El Hajjam (omisduas per foul) – corners: 5:2. – CB Trun/Rabius 1 Grp. senza Denis Monn e Jonas Beer

       

CB Trun/Rabius  |  Caum postal 153  |  CH-7166 Trun  |  +41 78 789 74 36  |  secretari@cb-trun-rabius.ch